Иммунизация системасынын кызматкерлерин окутуу вакциналарды сактоонун натыйжалуулугун жогорулатат

2025-жылдын 17-сентябрынан 19-сентябрына чейин Бишкекте үч күндүк тренинг өтөт. Бул тренинг муздатуучу камералардын квалификациясына жана вакциналарды жеткирүү чынжырчасында температурага жүргүзүлгөн мониторингдин башка өңүттөрүнө арналат.
‎
‎Иш-чаранын максаты – вакциналарды сактоонун натыйжалуулугун жана коопсуздугун жогорулатуу, вакциналарды жеткирүүнүн жана сактоонун бардык этаптарында алардын талаптагыдай сапатын камсыз кылуу. Тренингди ЮНИСЕФтин техникалык колдоосу менен Республикалык иммунопрофилактика борбору өткөрүп жатат.
‎
‎Тренингге республиканын бардык аймактарынан “муздатуучу чынжырды” башкарууга байланышкан негизги көндүмдөрдү өздөштүрүү жана иштетүү үчүн Мамлекеттик санитардык-эпидемиологиялык көзөмөл борборлорунун адистери катышат. Программа өзүнө интерактивдүү викториналарды, практикалык сабактарды жана талкууларды камтыйт.
‎
‎Программанын өзөктүк учурлары:
‎✅ 1-күн: Негизги көңүл температураны өлчөгүчтөр менен иштөөгө бурулат. Катышуучулар температураларды каттап, логгерлер үчүн программалык камсыздоону орнотуп жана тууралап, так картирлөө үчүн аларды муздатуучу камераларда жайгаштырганды үйрөнүшөт.
‎
‎✅ 2-күн: Катышуучулар жеткирүү чынжырчасынын өңүттөрүн, анын ичинде температуралык картирлөөнүн жана муздатуучу камералардын квалификациясын текшерүүнүн маанилүүлүгүн карап чыгышат. Ошондой эле логгерлердин жардамы менен алынган маалыматтарды талдоо боюнча практикалык сабактар өткөрүлөт.
‎
‎✅ 3-күн: Акыркы күн муздаткычты алмаштырууга жана жабдууларды тууралоого, маалыматтарды талдоого жана регионалдык муздатуучу кампаларды регионалдык пландоого байланышкан маселелерди талкуулоого арналат.
‎
‎Иш-чара Кыргыз Республикасынын Саламаттык сактоо министрлигинин 2024-жылдын 19-июнундагы №660 “2024-2025-жылдарга вакциналарды натыйжалуу башкарууну жакшыртуу боюнча иш-чаралар планын бекитүү жөнүндө” буйругун, ошондой эле “Температураны картирлөө боюнча улуттук СОПту иштеп чыгуу жана кабыл алуу” документинин 4-пунктун ишке ашыруунун алкагында өткөрүлүүдө.
‎
‎Тренинг катышуучуларга тажрыйба алмашууга жана вакциналардын коопсуздугу жаатында билимин өркүндөтүүгө уникалдуу мүмкүнчүлүк берет.