КР Саламаттык сактоо министрлигинин Республикалык иммунопрофилактика борбору маалымдайт: өлкөдө кызамык оорусу катталган учурлар азайып жатат.

1-сентябрдан 17-сентябрга чейин өлкөдө кызамык оорусунун 49 учуру катталды. Салыштыруу үчүн айта турган болсок, июль айында 828, ал эми августта 260 учур катталган.

Жыл башынан бери 17-сентябрга чейин Кыргызстанда кызамыктын 13 320 учуру катталды.

Аймактар боюнча бөлүштүрө келгенде, Бишкек шаарында 4891, Ош шаарында 834, Ош облусунда 1804, Баткен облусунда 499, Чүй облусунда 3316, Жалал-Абад облусунда 1401, Ысык-Көл облусунда 245, Нарын облусунда 177, Талас облусунда 153 учур катталды.

Кызамыкты жуктургандар азайып жатканы менен, вирус негизинен Бишкекте жана Чүй облусунун борборго жакын эки районунда чыгып жатат, бул жакта вирус стационардык очоктордун эсебинен жайылууда.

Эске сала кетсек, кошумча жана тазалоочу эмдөө өнөктүктөрү кызамык менен күрөштө маанилүү иш-чаралардын бири болуп калды.

Бул өнөктүктүн кезектеги этабынын алкагында бүгүнкү күндө Талас облусунда максаттуу топко кирген 25 774 баланын ичинен 23 548и эмделди, бул 91 пайызды түзөт. Ысык-Көл облусунда максаттуу топко кирген 46 050 баланын ичнен 39 586сы эмделди, бул 86 пайызды түзөт. Нарын облусунда максаттуу топко кирген 26 340 баланын ичинен 19 979у эмделди, бул 76 пайызды түзөт. Баткен облусунда максаттуу топко кирген 80 084 баланын ичинен 57 873ү эмделди, бул 72 пайызды түзөт.

Пландуу жана кайра эмдөөнүн жүрүшүндө кызамыкка каршы вакцинанын 2 дозасын тең алган балдарды кошпогондо, эмдөөдөн 9 айдан 7 жашка чейинки курактагы бардык балдар өтүүгө тийиш.

Жыл башында эмдөө боюнча ушундай эле өнөктүк Жалал-Абад облусунун аймагында жүргүзүлүп, анда максаттуу топко кирген 183 607 баланын ичинен 161 546сы эмделди, бул 88 пайызды түзөт.

Республикалык иммунопрофилактика борбору өлкөнүн аймактарында медициналык кызматкерлер үчүн тренингдерди демилгелеп, аларды туруктуу негизде өткөрүп келатат. Тренингдерде вакцинага каршы көрсөтмөлөр, алардын коопсуздугу, калк арасында түшүндүрүү иштерин жүргүзүү тууралуу маалыматтар берилет.

Также рекомендуем

Аймактарда кызамыкка жана кызылчага каршы тазалоочу эмдөө жигердүү өтүп жатат

01.11.2024

Вакцинага байланыштуу техникалар ар дайым көзөмөлдө жана аяр мамиле менен колдонууда.

25.10.2024