Опубликовано: 28 июня 2019
Обновлено: 17 октября 2021

ВГВ вакцина

ВГВ вакцина – гепатит В вирусуна каршы вакцина, бул алюминий гидрооксидге адсорбирацияланган гепатит В вирусунун үстүртөдөн алынган белоктун (HBsAg) мыкты тазаланган инфекциялык эмес полипептиди. Препарат гендик-инженердик вакцина болуп саналат. Анда HBsAg продуцирлөөсү ачыткы клеткаларында жүрөт. Бул жаңы төрөлгөн ымыркай 24 сааттын ичинде алган алгачкы вакциналардын бири.

Вакцинация эмне үчүн жүргүзүлөт: гепатит В вирусуна каршы активдүү иммундаштыруу.

Колдонуу ыкмасы жана өлчөмү: вакцина булчуңдун ичине, жамбаш сөөктүн алдыңкы-капталына киргизилет. Жаны төрөлгөн ымыркайларга жана 1 жашка чейинки наристелерге 0,5 мл өлчөмүндө.

Каршы көрсөтмөлөр: ачыткыга аллергия.

Вакцинаны киргизүүгө реакция:
Көбүн эсе жергиликтүү реакциялар белгиленет: кызаруу, ооруксунуу, шишип калуу, катып калуу. Вакцинациядан кийин 2-3 күндүн ичинде өтүп кетет.
Жалпы реакциялар: тынчы кетүү, шалдыроо, баш оору, жүрөк айлануу, кусуу, баш айлануу, миалгия, артрит.
Сейрек кездешүүчү реакциялар: дене табынын көтөрүлүшү (38,8°Сдан жогору).

Курамы:

0,5 вакцинада камтылат:

• Активдүү ингредиент: тазаланган HBsAg -10мкг
• Адъювант: алюминий гидроксия гели – 0,25 мг
• Консервант: тиомерсал – 0,005 мг

Жардам берүүчү заттар: бир негиздүү калий фосфаты, эки негиздүү натрий фосфаты, хлорлуу натрий.

Чыгаруу формасы: 1 дозалуу флакон.

БЦЖ вакцина

БЦЖ (Кельметт-Герендин Бацилласы) – жандуу алсыздандырылган бактериялык вакцина, лиофилизирленген (кургатылган) эритме менен комплектиде.

Вакцинация эмне үчүн жүргүзүлөт: кургак учуктун профилактикасы

Колдонуу ыкмасы жана өлчөмү: жаңы төрөлгөндөр үчүн эмдөө өлчөмү – 0, 05 мл, сол ийинине так теринин алдына киргизилет.

Каршы көрсөтмөлөрү:

• Жаңы төрөлгөн ымыркайдын салмагы 1500 граммдан төмөн болсо (салмагы 2000 грамга жеткенде эмдөө жасалат);
• Курч патология же өнөкөт оорулардын курчушу (мисалы, жатын ичиндеги инфекция, жаңы төрөлгөндөрдүн гемолитикалык оорулары, неврологиялык өзгөрүүлөр, теринин системалык патологиясы). Аталган абалдар болгон учурда БЦЖ эмдөөсү баланын абалы нормалдашканга чейин жылдырылат.

Вакцинаны киргизүүгө реакция: БЦЖ үчүн спецификалуу жергиликтүү реакция мүнөздүү. Эмдөө жасалган жерде жара пайда болот, ал карттанып кийин айыгат. Айыккандан кийин карты түшөт. Бул эмдөөнү алганын көрсөтүп турган, 3-10мм өлчөмүндөгү тырык калат.

Сейрек кездешүүчү терс реакциялар:

• теринин  үстүндө жара
• теринин алдындагы абцесс
• регионардуу лимфаденит
• келоиддик тырык

Вакцинага реакция жылдырылгандарга кирет, анткени инъекция жасалгандан 4-6 жумадан кийин калыптанат.

Курамы:
Негизги компоненти: 70% жандуу алсыздандырылган микробдор – 0,5 мг
Жардам берүүчү зат: глютамат натрий
Эритмеси: натрийдин изотоникалык эритмеси

Чыгаруу формасы: 20 дозалуу флакон.

АКДС-ВГВ-ХИБ (суюк аралашкан пентавакцина)

Пентавакцина– бул 5 антигенден турган, биргелешкен көп компоненттүү вакцина. Вакцинанын активдүү бөлүгү тазаланган дифтерия жана тырышма токсиндерин, көк жөтөлдүн таякчаларынын инактивдүү бөлүктөрүн, мыкты тазаланган инфекциялык эмес HBsAg бөлүктөрүн, b тибиндеги гемофилдик таякчанын компоненттерин өзүнө камтыйт.

Эмне үчүн вакцинация жасалат:  дифтерия, көк жөтөл, тырышма, гепатит В вирусу жана b тибиндеги гемофилдик инфекцияга каршы активдүү иммундаштыруу.

Колдонуу ыкмасы жана өлчөмү: вакцина булчуңдун ичине, жамбаш сөөктүн алдыңкы капталына, 0,5 өлчөмүндө гана киргизүүгө ылайыкталган. 

Каршы көрсөтмөлөрү: вакцинанын компоненттеринин бирине жогору сезимталдуулук же буга чейинки биргелешкен вакцинанын өлчөмүнө же компоненттеринин бирине олуттуу реакция.

Вакцинаны киргизүүгө реакция:
Жергиликтүү реакциялар: кызаруу, катуу ооруксунуу.
Жалпы реакциялар: тынчы кетүү, ыйлаак болуу, вакцинация жасалгандан кийин 48 сааттын ичинде дене табынын бир аз көтөрүлүшү. Көпчүлүк учурда 2-3 күндүн ичинде медициналык кийлигишүүсүз өзү өтүп кетет. Бардык жергиликтүү жана жалпы реакциялар из калтырбай жок болот.

Сейрек кездешүүчү терс реакциялар:

• Дененин температурасы 39,5°С дан жогору болуу (15 000 киргизилген дозага бирөө);
• Тарамыштын түйүлүүсү (12 500 киргизилген дозага бирөө);
• Вакцина киргизилгенден кийин 48 сааттын ичинде 3 сааттан ашык тынбай ыйлоо (3000 киргизилген дозага бирөө);
• Аллергиялык реакциялар (бөрү жатыш, Квинке шишиги, анафилактикалык шок – 1 миллион киргизилген дозага бирөө).

Курамы:

Активдүү заттар:

• тазаланган дифтериялык анатоксин 7,5 Lf тен тен кем эмес (30 МЕ ден кем эмес)
• тазаланган тырышма анатоксин – 3,25 Lf тен тен кем эмес (60 МЕден кем эмес)
• инактивдүү В. Pertussis (бүтүн клеткалуу, дене табын түшүрүүчү суспензия) 15 OU кем мес (4 ME ден кем эмес).
• ХИБ олигосахарид 1- мкг, СПР 197 нин 25 мг менен байланышкан
• Гепатит В вирусунун үстүртөдөн алынган антигени, тазаланган 10 мкг

Жардам берүүчү зат: фосфат алюминий, натрий хлорид, инъекция үчүн суу.

Чыгаруу формасы: 1 дозалык флакон

ОПВ вакцина

ОПВ – оралдык полиомиелиттик вакцина, бул 1 жана 3 Сабин штаммдарынын жандуу алсыздандырылган полиомиелит вирустарын камтыган препарат.

Эмне үчүн вакцина жасалат: 1 жана 3 тибиндеги полиомиелит вирусуна каршы активдүү иммундаштыруу.

Колдонуу ыкмасы жана өлчөмү: вакцина ооз аркылуу берилет, 2 тамчы өлчөмүндө.

Каршы көрсөтмөлөр:

• неомицинге, полимиксинге же вакцинанын башка компоненттерине карата сезимталдуулук;
• биринчи жана экинчи ирет иммундук жетишсиздиктен жабыркаган бейтаптарга инактивдүү мыктыланган полиовакцинаны колдонуу сунушталат (ИПВ).

Кеңейтилген Иммундаштыруу программасынын сунуштамаларына ылайык, адамдын иммундук жетишсиздигинин вирусу менен симптоматикалык жана асимптоматикалык инфекциясы ОПВ иммундаштыруу үчүн каршы көрсөтмө болуп саналбайт. 

Вакцинага реакциялар:
Олуттуу эмес жалпы реакциялар: тынчы кетүү, алсыз болуу, тамакка болгон табиттин төмөндөшү.

Сейрек кездешүүчү реакциялар:

• паралитикалык полиомиелиттин белгилери жана симптомдорунун өрчүшү вакцинацияланып жаткандарда эмдөөдөн кийин 30 күндүн ичинде жана тез кабыл алуучу контакттуу адамдардын ичинен 60 күндүн ичинде болушу мүмкүн. Болуп калуу жыштыгы – 10 миллионго 1 учур;
• вакцинанын компонеттерине аллергиялык реакция.

Курамы:

Активдүү заттар:

• 106.0 СCID50 активдүүлүгү менен 1 типтеги (LSc, 2 ab) полиомиелит вирусунун аттенуирленген жандуу Сабин штаммдары
• 105.8 CCID50 активдүүлүгү менен 3 типтеги (Leon, 12a, 1b) полиомиелит вирусунун аттенуирленген жандуу Сабин штаммдары.

Жардам берүүчү заттар:

• магний хлориди
• аргинин
• полисорбат
• неомицина сульфат
• полимиксина В сульфат
• тазартылган суу.

Чыгаруу формасы: 10 жана 20 дозалык флакондор.

ИПВ вакцина

ИПВ вакцина – инактивдүү полиомиелиттик вакцина, 1,2 жана 3 тибиндеги Сабин штаммынын полиомиелиттин инактивдүү вирустарынан турган стабилдештирилген препарат. Биринчи жана экинчи ирет иммундук жетишсиздиктен жабыркаган бейтаптарга мыктыланган инактивдүү полиомиелиттик вакцинаны колдонуу сунушталат (ИПВ).

Эмне үчүн вакцинация жүргүзүлөт: 1,2 жана 3 тибиндеги полиомиелит вирусуна каршы активдүү иммундаштыруу.

Колдонуу ыкмасы жана өлчөмү: вакцина 1 жашка чейинки балдарга 0,5 мл өлчөмүндө, булчуңдун ичине, сол жамбаш сөөктүн алдыңкы капталына киргизилет.

Каршы көрсөтмөлөр: неомицин, полимиксин жана вакцинанын башка компонеттерине болгон жогору сезимталдуулук.

Вакцинага реакциялар: тынчы кетүү, алсыздануу, тамакка табиттин төмөндөшү.
Сейрек кездешүүчү реакциялар: вакцинанын компоненттерине аллергиялык реакция.

Курамы:

• 40 D антигендик бирдиктердин 1 (Махони) тибиндеги полиомиелит инактивдүү вирусу;
• 8 D антигендик бирдиктердин 2 (MEF 1) тибиндеги полиомиелит инактивдүү вирусу;
• 32 D антигендик бирдиктердин 3 (Saukett) тибиндеги полиомиелит инактивдүү вирусу.

Чыгаруу формасы: 1 дозалык флакондордо.

ПКВ вакцина

ПКВ вакцина – пневмококктук полисахариддик конъюгирленген адсорбиленген 13 валенттүү вакцина. ПКВнин курамына 90% серотиптер кирет. Алар антибиотиктерге туруктуулук көрсөткөн инвазивдүү пневмококк инфекцияларынын (ИПИ) өнүгүү себеби болуп саналат.

Эмне  үчүн вакцинация жүргүзүлөт: пневмококк инфекциясына каршы иммундаштыруу.

Колдонуу ыкмасы жана өлчөмү: вакцина 1 жашка чейинки балдарга булчуңдун ичине, сол жамбаш сөөктүн алдыңкы капталына киргизилет. 12 айлык баланын ийинине 0,5 мл өлчөмүндө киргизилет. 

Каршы көрсөтмөлөр:

• Инфекциялык, инфекциялык эмес жана өнөкөт оорулар курч өтүп турган учур (Толугу менен жакшы болгончо же ремиссия мезгили келгенде);
• Буга чейинки вакцинаны киргизгенде оор генерализацияланган аллергиялык реакция, анафилактикалык шок жана жогорку сезимталдуулуктун башка реакциялары;
• Препараттын компоненттерин индивидуалдуу көтөрө албагандык.

Вакцинаны киргизүүгө реакция:

• Көпчүлүк учурда: вакцина киргизилген жердин ооруксунуусу, 3 күндөн кем эмес. Реакциялар жок болуп медициналык кийлигишүүнү талап кылбайт.
• Сейрек: дене табынын бир аз көтөрүлүшү.
• Өтө сейрек:  олуттуу аллергиялык реакциялар, миллион эмделгендердин ичинен 1 учур.

Курамы:

Активдүү заттар:

• 1,3,4,5,6А,7F,9V, 14, 18С, 19А, 19F жана 23F серотиптердин пневмококтук полисахариддери, — 2,2 мкг өлчөмдө;
• пневмококктук полисахарид серотип 6В – 4,4 мкг;
• дифтериялык протеин  СРМ – 34 мкг.

Жардам берүүчү заттар:

• алюминий фосфаты
• полисорбат
• хлористүү натрий
• инъекциялар үчүн суу

Чыгаруу формасы: 1-дозалык флакондо. 

КПК вакцина

КПК вакцина — кызылча, паротит жана кызамыкка каршы вакцина. Анда кызылча, паротит жана кызамыктын жандуу алсыздандырылган вирустары бар.

Вакцинация эмне үчүн жүргүзүлөт: кызылча, эпидаротит жана кызамыкка каршы активдүү иммундаштыруу.

Колдонуу ыкмасы жана өлчөмү: вакцинаны 0,5 мл өлчөмүндө ийиндеги тери алдына киргизүү зарыл.

Каршы көрсөтмөлөр:

• курч соматикалык жана инфекциялык оорулар;
• анамнезде вакцинанын компоненттерине аллергиялык же анафилактикалык реакциянын болушу (неомицин жана тооктун белогу)
• кош бойлуулук
• лейкемия
• нак байкалган анемия жана кандын башка оор дарттары, анын ичинде бөйрөктүн функцияларынын оор өзгөрүүлөрү
• декомпенсация стадиясындагы жүрөк оорулар
• илдеттүү шишиктер

Вакцинаны киргизүүгө реакция:

• Басымдуу учурда: вакцина киргизилген жерде жергиликтүү реакция, кызаруу, ооруксунуу.
• Көбүрөөк: дене табынын көтөрүлүшү, денени майда быдырала басышы.
• Сейрек: дене табынын көтөрүлүшү, тарамыштын түйүлүшү.
• Өтө сейрек:
• мээ жана жүлүндүн сезгениши (энцефаломиелит 1 миллион эмдөөгө 1 учур);
• олуттуу аллергиялык реакциялар 1 миллион эмдөөгө 1 учур;
• тромбоцитопения 30000-40000 эмдөөгө 1 учур;
• аллергиялык реакциялар (анафилактикалык шок) 10 миллион эмдөөгө 3,5 учурда.

КПК-вакцинанын кызыл компонентине реакциялар:

Өспүрүм кыздардын жана чоң аялдардын артралгиясы жана артрити, алар бир нече күндөн 2 жумага чейин созулат. Аталган реакциялар өзү менен өзү дарылоосуз жок болот.

Курамы:

Активдүу заттар:

• кызылчага каршы алсыздандырылган вирустар (1000 ТДЦ50 кем эмес)
• эпидпаротит (5000 ТДЦ50)
• кызамык (1000 ТДЦ50)

Жардам берүүчү заттар:

• жарым-жартылай гидролизделген желатин
• сорбито
• неомициндин издери
• инъекция үчүн суу

Чыгарылган формасы: 5,10-дозалык флакон.

АКДС вакцина

АКДС – адсорбирленген көк жөтөл-дифтерия-тырышма вакцинасы. Дифтерия жана тырышманын тазаланган токсиндерин жана көк жөтөлдүн инактивдүү бөлүкчөлөрүн камтыган бир калыптагы суюктук.

АКДС вакцина кургак учук, полиомиелит, кызылча, кызамык, эпидпаротит жана профилактикалык эмдөө календарындагы башка вакциналар менен бир учурда коопсуз жана эффективдүү киргизиле берет.

Эмне үчүн вакцинация жүргузүлөт: дифтерия, көк жөтөл жана тырышмага каршы активдүү иммундаштыруу

Колдонуу ыкмасы жана өлчөмү: вакцина булчуңдун ичине, 18 айга чейинки балдарга жамбаш сөөктүн капталына же 18 айдан улуу балдарга ийинине 0,5 мл өлчөмдө киргизилет.

Каршы көрсөтмөлөр:

• вакцинанын кайсы бир компонентине жогору сезимталдуулук;
• буга чейин жасалган биргелешкен вакцинанын кайсы бир компонентине олуттуу реакция.

Вакцинаны киргизүүгө реакция:

Кадимки жергиликтүү реакциялар: кызаруу, катып калуу, ооруксунуу.

Жалпы реакциялар: эч нерсени жактырбоо, ыйлаак болуу, дене табынын бир аз көтөрүлүшү. 38°С жогору температура вакцина жасалгандан кийин 48 сааттын ичинде пайда болуп, көпчүлүк учурда эки-үч күндүн ичинде өз алдынча, медициналык кийлигишүүсүз жоголот.

Бардык жергиликтүү жана жалпы реакциялар эч кандай залал келтирбей жок болот.

Сейрек кездешүүчү терс реакциялар:

• дене табынын 39,5°С га чейин көтөрүлүшү (15 000 жасалган эмдөөгө 1 учур);
• Фебрилдик тарамыштын түйүлүүсү (12 500 эмдөөгө 1 учур);
• Вакцина киргизилгенден кийин 48 саатын ичинде 3 сааттан ашык убакты тынбай ыйлоо (3000 жасалган эмдөөгө 1 учур);
• Аллергиялык реакциялар (бөрү жатыш, Квинке шишиги, анадилактикалык шок 1 миллион жасалган эмдөөгө 1 учур).

Курамы:

Активдүү заттар:

• тазартылган дифтериялык анатоксинден 20 Lf тен кем эмес (30 ME ден кем эмес);
• тазартылган тырышма анатоксини 7,5 Lf тен кем эмес (40 ME ден кем эмес);
• В. Pertussis инактивдүү (көк жөтөлгө каршы бүтүн клеткалык суспензия) 12 OU кем эмес.

Жардам берүүчү заттар:

• алюминийдин гидрокычкылы 2,5 мг/мл көп эмес;
• тиомерсал 0,1 мг/мл көп эмес.

Чыгаруу формасы: 10 дозалуу флакон.

АДС вакцина

АДС – адсорбирленген дифтерия-тырышма анатоксини. Тазартылган дифтерия жана тырышма токсиндерин камтыган бир калыптагы суюктук.

Вакцинация эмне үчүн жасалат: тырышма жана дифтерияга каршы активдүү иммундаштыруу.

АДС-анатоксин колдонулат:

• көк жөтөл болуп ооруган балдарга (3 айлык кезинен тартып 6 жашка чыкканча);
• АКДС-вакцинаны киргизүүгө каршы көрсөтмөлөрү бар балдарга;
• Мурда дифтерия жана тырышмага каршы эмдөө ала элек 4-5 жаштагы балдарга.

Каршы көрсөтмөлөр:

• Анатоксиндин кайсы бир компонентине жогору сезимталдуулук же мурунку анатоксиндин дозасына болгон реакция;
• Курч инфекциялык жана инфекциялык эмес оорулар – эмдөө айыккандан кийин 2-4 жумадан эрте эмес жасалат. Илдеттин жеңил формаларында (ринит, жеңил гиперемия ж.б.) клиникалык симптомдор жоголгондон кийин уруксат берилет;
• Өнөкөт оорулар – толук же жарым-жартылай ремиссия учурунда эмдөө жасалат;
• Неврологиялык өзгөрүүлөр – процесстин прогресси жок экени аныкталгандан кийин эмдөө жасалат;
• Аллергиялык оорулар – эмдөөнүн курч мезгили өткөндөн кийин 2-4 жумада жасалат, оорунун туруктуу белгилери (теридеги көрүнүштөр, жашыруун бронхоспазм ж.б.) вакцинацияга каршы көрсөтмө болуп саналбайт. Ал жалпы терапиянын фонунда жасала берет.

Колдонуу ыкмасы жана өлчөмү: вакцина 0,5 мл өлчөмдө, ийиндин булчуңунун ичине киргизилет.

Вакцинаны киргизүүгө реакция:

Кадимки жергиликтүү реакция: вакцинаны сайган жеринде кызаруу жана оруксунуу.
Жалпы реакция: алы кетүү, шалдыроо.
Бардык жергиликтүү жана жалпы реакциялар залалсыз жоголот жана медициналык кийлигишүүнү талап кылбайт.

Сейрек кездешүүчү терс реакциялар: аллергиялык реакциялар (ангионевротикалык шишик, полиморфтук быдырлар, бөрү жатыш жана анафилактикалык шок) катталуу жыштыгы миллион эмдөөгө 1 учур.

Курамы:

Активдүу заттар:

• тазартылган дифтериялуу анатоксинден 30 Lf тен кем эмес (60 МЕ ден кем эмес)
• тазартылган тырышма анатоксинден 20 Lf тен кем эмес (80 МЕ ден  кем эмес)

Жардам берүүчү заттар:

• гидроокись алюминия
• тиомерсал

Чыгаруу формасы: 10 дозалуу флакон.

АДС-М вакцина

АДС-М – антигендерди төмөн камтыган адсорбирленген дифтерия-тырышма анатоксини. Вакцина бир калыптагы суюктук, тазартылган дифтерия жана тырышма токсиндерин камтыйт. Анатоксиндер алюминий гидроокиске адсорбирленген. Профилактикалык эмдөө календарындагы башка вакциналар менен кошо коопсуз жана эффективдүү киргизе берсе болот.

Вакцинация эмне үчүн жасалат: тырышма жана дифтерияга каршы активдүү иммундаштыруу.

Каршы көрсөтмөлөр:

• анатоксиндин компоненттеринин бирине жогорку сезимталдуулук;
• анатоксиндин буга чейинки дозасына олутуу реакция.

Колдонуу ыкмасы жана өлчөмү:

Колдонуу ыкмасы жана өлчөмү: вакцина 0,5 мл өлчөмдө, ийин булчуңунун ичине киргизилет.

Вакцинаны киргизүүгө реакция:
Кадимки жергиликтүү реакция: вакцинаны сайган жеринде кызаруу жана оруксунуу.
Жалпы реакция: алы кетүү, шалдыроо.
Бардык жергиликтүү жана жалпы реакциялар залалсыз жоголот жана медициналык кийлигишүүнү талап кылбайт.

Сейрек кездешүүчү терс реакциялар: аллергиялык реакциялар (ангионевротикалык шишик, полиморфтук быдырлар, бөрү жатыш жана анафилактикалык шок) катталуу жыштыгы миллион эмдөөгө 1 учур.

Курамы:
Бир 0,5 мл-дык доза камтыйт

Активдүу заттар:

• тазартылган дифтериялуу анатоксинден 10 Lf тен кем эмес
• тазартылган тырышма анатоксинден 10 Lf тен кем эмес

Жардам берүучү заттар: гидроокись алюминия

Чыгаруу формасы: 10 дозалуу флакон.